أحس في صدري من الشوق وقاد=ياليت خلي يطفي الشوق ياليت
شوقٍ(ن)حرمني لذة النوم والزاد=عدة سنين بلذته ما تهنيت
شوقٍ(ن)يرافقني من بلاد لبلاد=يجري مجار الدم لصبحت وأمسيت
قلبي وفكري يم غاليه منقاد=ياما ليال طوال شوفه تمنيت
ودي بشوفه صدف وإلا بميعاد=ساعة زمن تسوى من العمر ما أفنيت
ساعة فرحها يعدل أفراح الأعياد=ما عاشها بالناس حيٍ(ن)ولا ميْت
ساعة تكون لعمرنا عيد ميلاد=نكتب بها تاريخ كل المواقيت
ننهل من الأشواق والشوق يزداد=بقلوب صارت للمشاعر توابيت
أُما شفينا من مواجيع الأكباد=والا سكبنا فوق نار الهوى زيت
تحرق بقايا العمر لن كان ما فاد=شوفتك ياللي خافقي صار لك بيت
حكمتني حكم المماليك بأسياد=مدري سواة الكنز حاكمه عفريت
مقدر أبد أنساك في قرب وبعاد=لا مرني طيفك من الفرح هليت
حتى لون البعد عن شوفتك كاد=تبقى حبيب الروح لن رحت وإن جيت
جاد الزمن وإلا عسى الوقت لا جاد=يحفظك ربي حيث يازين حليت
بنظم على شأنك جميلات الإنشاد=كل ما تذكرت بطاروق غنيت
مهما يشب الشوق بالصدر وقاد=بقضي بقايا العمر من ليت في ليت