فرحت بجيتك وأحسبك راجع لي غرام وشوق=لقيتك ما رجعت إلا بقصد تجدد جروحي
تعاتبني على فعلك بقطع الوصل يامخلوق=نسيت وعودك اللي شيبتني يا بعد روحي
شهور طوال دمي من بعادك ناشف ومحروق=أجامل للبشر وأنا من الأشواق مذبوحي
يبس عودي وجسمي ناشفٍ(ن)ماعاد فيه عروق=حرقها دمي اللي كنه بصالي من الفوحي
ذبحني هجرك وصدك بلا داعي ولا منطوق=وذا الحينه تعاتبني على الأسرار والبوحي
غريبة وين ذاك الطيب والرقة وحسن الذوق=تبدل حالك الأول بعد ما كنت مملوحي
تبي مني على كل الخطايا منك بعد حقوق=وأنا اللي لا بغيتك كن سمعك لي ما يوحي
كفاية لا تزودها أحس إني كما المخنوق=ظلمني حظي المنحوس صار القب مفدوحي
ليا صار الزمان يعوق وأنته بالطناش تعوق=وش اللي نكسبه من عمرنا والحظ مسدوحي
ترى ماني على خُبرك حصل عقب البعاد فروق=عرفت إني بهذا الوضع مالي فيك مصلوحي
تعبت أسرق لك اللحظات من عمرٍ(ن)ذهب مسروق=أسارق غفلة الحساد بين الضحك والنوحي
تمنيت الزمان يزين من شأن النفوس تروق=لكن الله كتب ما أراد قبل أكون باللوحي
بعد هذا تبيني ينشرح لك صدري المطبوق=محال أرجع كما ما كنت وين القا لي فروحي
عسى ربي يهونها علينا في زمن ممحوق=على الله شكوتي وإلا أنت فاللي صار مسموحي
من أول كنت عندي فوق واليومه شموخي فوق=فرحت بجيتك وأزعل ليا من قلت لك روحي