يا صحاري بلا زاد وشراب=من وقع بالمتاهات ابتلش
حفيت الرجل من وطي الصعاب=ما تهاب العقارب والحنش
يبست الريق من طرد السراب=تعبت الروح من شمس وعطش
ظلي الشمس والفرش التراب=كني اللي من الجمر افترش
يغلي القلب مني لين ذاب=من حروق التجافي والطنش
غاب ولفي وحلو العمر غاب=العنا زاد والفرح انكمش
صرت بعده مثل ناصي ركاب=أشتري وأتبايع بالنجش
مشغل الفكر مير الفكر خاب=الهنا غاب والهم إنتعش
ينزف الجرح بالقلب المصاب=حلم الأيام عجز وإنخرش
شوف عيني غطى فوقه ضباب=ما يرده علاج ولا نقش
عقب فرقاك يازين الشباب=حلم عمري كما العهن إنفش
حظي أسود مثل لون الغراب=ما يكب النذاله والغشش
كل ما قلت:يصلح زود خاب=صار مثل المسجى بالنعش
شبت والشعر مثلي بعد شاب=كل مابي من الوقت لإندهش
طول ليلي مثل عاوي ذياب=والمشاعر تعارك بالشوش
في صحاري بلا زاد وشراب=من وقع بالمتاهات ابتلش