يا مشغل الروح حل بخافقي عله=من يوم علقتها في وسط سلسالك
طال السهر والقدم مايعرف الذله=أدوس جمر الغضا في ليلي الحالك
رمح الهوى من فؤادي ياصعب تله=ماصار لي بالليالي ضعف ما جالك
مختل نبض الفؤاد بروح مختله=مافيه شيءِ من أوجاعي خاطر بالك
الكبد مجروحةٍ(ن)والروح معتله=من حالي اللي تدهور والسبب حالك
مشاعري من سنين طوال محتله=الشوق سجانها والصد خيّالك
علقتني في حبالٍ(ن)جات منشله=من حبك اللي غدى لي حاكم ومالك
عقّدتها عقدةٍ(ن)ماهي بمنحله=على خفوقٍ(ن)يعاني جور غربالك
الدم يغلي مثل غلاي بالدله=وأنا على قولهم شربت فنجالك
سنيت لي بالهوى تال العمر مله=ملة غرامٍ(ن)عنيف وتابعه هالك
غرام زود على طين القهر بله=ماني بعارف طريق يقرّب وصالك
جتني سيوف الجفا والصد منسله=سدت بوجهي لدربٍ(ن)للهوى سالك
راحت ليال الهنا والأُنس والفله=من واقع الحال يرثا لي ويرثا لك
أفكارنا من عنا الأيام منشله=والليل يثقل ليا زلزله زلزالك
لكن واللي خلقنا والقسم بالله=ما أبدلك بالبشر لو فيهم أمثالك
يا مشغل الروح حل بخافقي عله=من يوم علقتها في وسط سلسالك