يا ونتي بالهون بالهون بالهون=لا تفجرين القلب خلف الضلوعي
الحال قام يصير من دون في دون=مثل زمانٍ(ن)فات صعبٍ(ن)رجوعي
اليأس صار لباطن الروح مقرون=عقب العزم يا نفس صاير جزوعي
غديت أنا في صف ناسيٍ(ن)يونون=ما كان هذا الحال ضمن الطبوعي
لكن جبرني وقتي الله بالعون=الواحد الرحمن ماهو قطوعي
اللي يعلم السر قدام ما أكون=وأنعم عليه بالنظر والسموعي
قادر يحقق مطلبي خالق الكون=قدام يمضي من شهرنا سبوعي
ايجيب لي اللي له القلب مرهون=الغالي اللي منه فكري يزوعي
غلاه وسط القلب يكبر ومصيون=من يوم هو طفلٍ(ن)صغيرٍ(ن)فروعي
أنا حفظته داخل العين بالنون=غلاه عندي فوق غالي ربوعي
الغالي اللي كل مافيه مزيون=نور حياتي مثل نور الشموعي
أهواه قبل الناس بالحب يدرون=يهواه دمي والفكر والدموعي
أبكي غيابه والمخاليق يبكون=فرقا الأحبة للمشاعر يروعي
يا ونتي بالهون بالهون بالهون=لا تفجرين القلب خلف الضلوعي