يا منية الروح قلبي صك بيبانه=ما عاد له بالهوى بعد الجفا طمعه
قصر الهوى قيض الهجران لأركانه=وشلون نقدر تشيد واحدٍ(ن)صنعه
الصد ينخر لعمدانه وسيسانه=كل ما تقربت منك اتزيدني وجعه
زود التغلي هدم عرشك وبنيانه=الحب تحته ونار الهجر من فرعه
زلزال بعدك عثا بالقلب شيطانه=حطم لقنديل حلمي وإنطفى شمعه
عامين ما شفت زولٍ(ن)سحري أعيانه=والشوق زايد بقلبي طعنه ورمعه
ما سلوتي غير طيفٍ(ن)حافظ الوانه=أخذ من البرق لون وسرعة اللمعه
طيفٍ(ن)يغازل عيوني صعب نسيانه=ايمر في سرعةٍ(ن)ويعود في سرعه
الفكر يجمح معه والقلب ميدانه=على حصان الهوى مرواح مع رجعه
لين التعب هد حيلي والشقا عانه=ذبح حلوم الزمن من شدة الصرعه
يا منية الروح قلبي صك بيبانه=ما عاد له بالهوى بعد الجفا طمعه