نامت عيون اللي من الحب مرتاح=ما جاء بباله يسهر الليل كله
وأنا من المغرب ليا وقت الأصباح=ايتلني حبل الهوى قبل أتله
لا من ذكرت اللي خذ القلب ثم راح=أون ونة من شكى سقم عله
ما سلوتي الا قصيدي ومسباح=افركه بكفوفي وأعوّد وأفله
لا من خفيف الدم من لوعتي فاح=غنيت طاروقٍ(ن)هجوسي تدله
مصداره النابض بعد بالهوى طاح=مشتاق للي فيه حُسن وجبله
في كل وقت أذكره مسرى ومسراح=راسخ بفكري والفكر ما يمله
طيفه معي في كل سرحة ومرواح=يذكي لنار الشوق والأمر لله
جرح الهوى بالقلب ما عاد ينزاح=عقب لضغط الدم بالقلب خله
محتار ما بين التكتم والإفصاح=وأخاف لا دمع المحاجر تهله
لا عدت يا دمعٍ(ن)من العين فضاح=يرخص لقدر اللي ربوعه تجله
وأنا أشهد إن الشوق للقلب ذباح=والحب مشهود له في كل مله
أقسى على العشاق من طعن الأرماح=لا من تغيب خل ما شاف خله
لو هو شجيع من الوله والوجع صاح=الحب مطنوخ النشاما يذله
أتبع لبرق مولعي كل ما لاح=الريق ناشف والقطر ما يبله
ما نلت من تبع الهوى مجد وأرباح=إلا مواجيع(ن)بقلبي تعله
أسهر وأنا ماني من الهم مرتاح=واللي تريّح يرقد الليل كله