يا علني يا خل قبلة حياتك=ياللي تقول إني حلو بالتكلم
حلا كلامي ماخذه من حلاتك=والا بدونك يصبح الهرج علقم
أنا كلامي سكره من صفاتك=الحرف لا من جيت صوبه تبسم
عذب المشاعر منك والحسن ذاتك=كلي على بعضي بكلك متيم
أعشق كلامك وأهتني في سكاتك=في كل حالاتك على الجرح بلسم
الشهد يقطر من مناحل شفاتك=يا بسمة أيام العمر يالملثم
أهواك من مولدك حتى مماتك=هواك يجري في عروقي مع الدم
من حين شفتك صار فكري مراتك=لا مرني طيفك له الطرف سلهم
ياقف له إحساسي وشوقي عباتك=يأمر على روحي وأنا مجهز لتم
أسامر أحلامٍ(ن)بها ذكرياتك=محاسنٍ(ن)من حظي اللي تقدم
أيام كان الشوق يقطع صلاتك=وأنا أذكرك بالفرض قدام أسلم
يا علني يا خل قبلة حياتك=ياللي تقول إني حلو بالتكلم