السالفة بالمختصر نحن الأثنين=أقول وتقولين فني فنـونك
لكن أنا بسمعك شنهو تقولين=هاتي سؤالك وإخرجي من سكونك
قالت:تحب وقلت حب المجانين=قالت:يا حظ اللي تحبه جنونك
قلت:اسمحي لي كان ودك تعرفين=شوفي مراتك يخبرنك عيونك
لولاك أنا ما كنت مثل المساكين=أرجي وصالك والمعيقات دونك
أسهر مع الأطياف وأنتي تنامين=أحلام ليلي شكلهن ما يجونك
وليا صحيتي صبح صوبي تدزين=اليوم كيف أصبحت وشلون لونك
وأنا أدري إنك بالحقيقة تعرفين=الحال ما يخفاك ميت بدونك
وأنا أدري إنك بالمشاعر تحسين=لكن ظروفك والليالي تخونك
وأنا أدري إنك مثل ودي تودين=الله يكون بعون قلبي وعونك
لكن طلبتك مطلبي لا تردين=لا تتعبين ولا تزيدي شجونك
نوم الهنا والعافية قرة العين=أنا جنوني بالهوى ما تخونك
أنتي غرامي قبل حاضر وبعدين=ما عشت قلبي بالمحبة زبونك
هذا جوابي يوم عني تسالين=أنا أحبك والبشر يحسدونك
غرامنا مقسوم ما بين قلبين=قلبي وقلبك والسراير تصونك
السالفة بالمختصر نحن الأثنين=أقول وتقولين فني فنونك