حسبي الله فوق من فجر المسجد يا حيف=الوجع ذيبه بصدري من الونة عوى
جعل روحه في جهنم مع بليس الحليف=تشوي لوجه وتحرق عظامه والشوى
وده يفرق لشمل الوطن خاسي مجيف=الوطن وأهل الوطن صفهم ما ينلوى
من بحر جدة ليا حد صفوى والقطيف=كلنا شيعة وسنة على الباغي سوا
ما يفرقنا مفرق ولا نخشى مخيف=صفنا واحد حكومة وشعب وما حوى
الشريعة منهج الكل والغادر ضعيف=لو جرحنا بالخيانه تكـاتفنا دوا
ما نغير عهدنا لو نزف منا نزيف=ما نقدم للجهالة ونتبع للهوى
شعبنا ضد المعادي مع الحكام سيف=لين ننهي زمرة الشر ويطب الهوا
ما نسوم بالوطن كلنا حوله لفيف=المواطن من هوى موطنه عاده روى
الوطن شريف واللي تربى به شريف=لا تظن بغير هذا ياملعون الثوا
مير صبرك ياقطيف السعد والله لطيف=أبشري بالنصر نقتص في دمٍ(ن)هوا
دمك الغالي ترى دمنا من غير زيف=والله انا ما نخليه في مرمى النوى
أبشري بالعز والعز لأهل العز كيف=كلنا فدوتك درعك بوجه اللي غوى
حسبي الله فوق من فجر المسجد يا حيف=الوجع ذيبه بصدري مع الونة عوى