بدري عليًه لا تغيبين بدري=البال في غيبتك لا يمكن يروق
يا سيدة قلبي وفكري وشعري=ما شاقني غيرك من البيض ياشوق
ملكتي إحساسي وبوحي وسري=جملتي أشعاري على كل طاروق
سلمتك الخفاق من غير مدري=عاشق وسلم كل ذاته لمعشوق
حبك رسخ مثل العقيدة بفكري=يا كاملة بالحسن والطيب والذوق
أنتي غرام الروح سرٍ(ن)وجهري=يا تاج راسي يا هنا نبض خافوق
هواك دمٍ(ن)باشرايين يجري=يا ملهمتني بالحكي كل منطوق
قبلك سنين العمر ضيعت هدري=ومعك بقايا العمر سارق ومسروق
يفداك كلي يابعد كل عمري=يافرحة الأيام في دم وعروق
أهواك لين أنحط في جوف قبري=وأهواك يوم البعث والطاق مطبوق
أنت قدر مكتوب ما من مفري=يا بلسم الآهات في قلب محروق
محروق من عشقٍ(ن)مولع بصدري=يشعل سواة الجمر ما يعرف رفوق
بدري عليًه لا تغيبين بدري=البال في غيبتك لا يمكن يروق