يا صاحبي سيف الجفا لا تسله...=ترى التباعد بارقه منك لاحي...
انا ترجيتك على كل مله ...=ياما رجيتك في مساي وصبـاحي...
لكن تركتيني وشكواي لله ...=ما حيلتي غير السهر والنواحي...
أبكي زمانٍ(ن)فات دقه وجله...=أيام كنتي تجلبين إنشـراحي...
راح الزمان الحلو ياصاح كله...=والعمر حلوه بعد ما رحت راحي...
ما باقي إلا جرح قلبي يعله...=ماني بلاقي طب يشفي جراحي...
طعنات صدك غايرة مو مجله...=من قوها نسيت معنى إرتياحي...
شكيت لين القلب مشكاي مله...=لا طاب جرح ولا الخفوق إستراحي...
قلبي تعب من كثر ماهو حصل له...=لكن جزاك من المحب السماحي...
أنا بعد ما ذقت هجرك يا فله...=والدم بعروق الشرايين فاحي...
عفت الهوى من عقب ذقت المذله...=اللي براسي من هوى البيض طاحي...
بحر الهجر يغرق وقلبي يتله ...=سكر غرامي فيه يا زين ماحي...
حبل الهوى نويت بيدي أحله ...=ما دام مابه للمشاعر صلاحي...
الصمت صاحب كل من راح خله....=وليا تحرك واهج الشوق صاحي...
الصد والهجران قلبه يغله ...=والصدر لا من ضاق عاف المزاحي...
يا صاحبي سيف الجفا لا تسله...=ترى التباعد بارقه منك لاحي...