سهران ليلي في هجوس وتصانيف=يلعب بي الهوجاس وأمشي مباريه
ذكرت منهو حال دونه صواديف=أرسل عليً يقول : مشتاق ياهيـه
قاله وأنا شوقي يفوق التصانيف=ما يدري إني في ضعفين مافيه
هيجت شوقي يا حسين التواصيف=وشلون اسوي واقدي من يطفيه
شبيت نار الشوق ويهفها الطيف=اللي عليًه من طيوفك مسريه
ودي بضمك ياعزيز المواليف=واشم ريحك واشرب الولف واسقيه
نشرب زلال العد من دون تسويف=كل واحدٍ(ن)ينهل لما هو يكفيه
ياليت ما نبغاه ياتي على الكيف=ابري لجرحك وأنت جرحي تداويه
لكن يا عزاه يا حيف يا حيف=البعد حايل بيننا كيف ننهيه
البعد كانفني وكاتفك تكتيف=حبل المسافة كيف يا خل نطويه
أون وأنت تون وأهيف وتهيف=والشوق جوف القلب بالجمر يكويه
إلى متى بنعيش من غير تصريف=تلعب بنا الأحلام والعمر نغديه
تعال وإلا جيت من دون تخويف=كافي زمانٍ(ن)فات واليوم نبكيه
العمر ضاع أكثره حلم وتحاسيف=واللي بقى مع بعض ياليت نقضيه
تعال نسهر مع بعض ليلة بصيف=تسوى سنينٍ(ن)العمر قدام تلفيه
تعال شاركني هجوس وتصانيف=العب مع الهوجاس وأنته تباريه