يا هاجسي الليل هات القصيدة=قصيدةٍ(ن)يفخر بها السر والبوح
برسل بها للي عساها سعيدة=تعبير عن قلبٍ(ن)من الشوق مجرح
يا غالية مرت سنينٍ(ن)عديدة=هواك في كل الطواريق مشروح
القلب ينزف شوق ناره وقيدة=الدم في كل الشرايين بيفـوح
لكن يا عزاه يا أندر فريدة=كرم زماني في محبتك بشحوح
الشوق طاغي والمسافة بعيدة=بيني وبينك يابعد كل مملوح
البعد كايد والليالي عنيدة=وأنا على شوفتك بلحيل مشفوح
مودتك بالقلب ماهي جديدة=الها سنين مواطنة داخل الروح
لكن قعد لي دون شوفك قعيدة=حظي معاند واللقاء غير مسموح
موانع الأيام دونك شديدة=ماني بلاقي حل بالصبر والنوح
أواه كيف الحل يا أغلى مجيدة ؟=هواك مشغل خاطري وين ما روح
حبك غدى لي مثل حكم العقيدة=قدر كتبه الله من قبل فاللوح
القى بحبك كل فكرة مفيدة=والقى بحبك ونة لقلب مذبوح
كل ما ذكرتك والمسافة مكيدة=ونيت ونة شيخ من رمح مطروح
وأخر نهايات الغرام الأكيدة=مهما يداري لوعة الشوق مفضوح
يا هاجسي الليل هات القصيدة=قصيدةٍ(ن)يفخر بها السر والبوح