يا سر الغرام اللي سكن داخل الخفاق=وش الحل بٌعدك بعد لقياك عـذبني
توقعت قبل القاك بلقى دوا عشاق=يداوي مواجيعٍ(ن)لها سنين تكربني
حسبت التلاقي يردع الشوق للمشتاق=لقيت التلاقي زود الشوق وأتعبني
يا سرع التلاقي مرً كنه لمع براق=شعل في عروق القلب للشوق والهبني
غرامك بقلبي واهجه حيل ما ينطاق=من سنين راسخ داخلي ما يسيبني
تجيني طيوفك مع حلوم الهوى بعناق=تعانق مشاعر بالحشا يا مشيبني
ما بين الرجا واليأس والهم صدري ضاق=أدور حلول وما بها حل يعجبني
زمان يتقلب بين لقيا تبعه فراق=وأنا مثل ماني فأس الأشواق تحطبني
فؤادي بغيبوبة يا نبض الهوى ما فاق=زماني يبعدني وطيفك يقربني
أمني لروحي والأماني بلا ميثاق=خفوقي يطاوعها وفكري مأنبني
أجيها من أقصى الشوق كلي لها تواق=وأعود بخف حنين والوجد راكبني
كما ما إبتديت أعود أنا والزمن بسباق=زماني يهدم لحلم طول الزمان أبني
يا سر الغرام اللي سكن داخل الخفاق=وش الحل بُعدك بعد فرقاك عذبني