ياليل موج الشوق يصفق فالأضلاع=هون على قلبي ترى الموج عاتي
لا تغرقه يا موج في داخل القاع=وش مصلحتك إنك تدمر حياتي
دام الأمل ياليل من دنيتي ضاع=مالي رجاء في حلم ممكن ما ياتي
بعض السلع ياليل ما عاد تنباع=واللي مضى من عمر ياليل فاتي
محال يرجع عمر لو كنت تباع=تبع المقفي مجلبة للشـكاتي
حتى لو إني في لياليه طماع=مر وتعدى والعوض صبر ذاتي
حلو العمر عدى ولا منه مرجاع=ما باقي إلا ونة الذكرياتي
ليت الزمن وقف قبل وقت الأوجاع=أيام كنت ازهو بحلو الصفاتي
ما كنت أظن الوقت للقلب شلاع=ولا كنت أظن الهم بالمقبلاتي
يا ليل ياللي بالهواجيس قطاع=إرفق بحالي قبل وقت المماتي
ما فات ياليل الشقا طقة إصباع=واللي بقي ياليل حاضن شقاتي
حلمك على قلبي ترى القلب منصاع=يتبع حلومه وإنشغل عن صلاتي
شغله منهو جامعٍ(ن)حلو الأطباع=اللي وهبته بالزمان حسناتي
حتى لو إنه بعض الأحيان مناع=راضي بكل اللي يسوي غناتي
يأمر وينهى خافقٍ(ن)للغلا طاع=والقلب يأمرني وأطيع بسكاتي
ياليل موج الشوق يصفق فالأضلاع=هون على قلبي ترى الموج عاتي