الوعد بيني وبينك ليلة البارح وعدا=ما لفيتي بالوعد مدري وشاللي حال دونك
طول عمري أبني الأحلام وأزعل ثم أهدا=الوناسة بالسهر ما تكتمل والله بدونك
ما يروق الجو لين أسمعك يالغالي تفدا=وأتمرا تحت نور الشمع في صافي عيونك
يا حلاة النور لا منه تكسر فوق خدا=وإشتعل مبسمك كنه جمرةٍ(ن)والبدر لـونك
حينها بنسى لعمري كم جاب وكم ودا=ما بقي بالذاكرة غيرك وأنا كلي زبونك
أتبايع وأشتري وإياك في شوقٍ(ن)و ودا=تقهر اللي يحسدوني وأقهر اللي يحسدونك
مير حظي منحس والحب بالروح إستبدا=أتمنى والأماني ما تريح من جنونك
كل ما جيتي ببالي جاير الشوق استشدا=ليتني أسهر معك ليلة تعلمني فنونك
ودي أسْمعك القصايد فيك ما تحصى بعدا=وأتسمع فيك تنشدها تزينها لحونك
مير فات الموعد اللي كان بالبارح وعدا=ما لفيتي بالوعد مدري وشاللي حال دونك