الهنوف اللي تقول إني هويتك شيبتني=بشرتني بالوصال وباشرتني بالقطيعه
عشمتني بالهنا وأثر الهنوف مدحلبتني=ودها تضحك عليه يوم أحول بالوقيعه
الوعود اللي تواعدها سرابٍ(ن)ما نفعتني=جنة الفردوس عند الغانية سراب قيعه
ليتها قدام توعدني وتخلف سيبتني=لو راحت وإستراحت ريحتني من صديعه
مير هذا حظي المنحوس دنيا عذبتني=بيني وبين الليالي يا هل الدنيا نزيعه
كل ما خلصت من مشكل على غيره رمتني=الليالي والعذارى ما يكبون الخديعه
نيتي مدري غبايه في زماني دهورتني=والمخادع في كثير من البشر صاير طبيعه
إنصحوني كيف أسوي بالنوايا حيرتني=كيف أميز صافي النية وأبو ذمة وسيعه
علموني يا هل الخبرة حظوظي غربلتني=والمشاكل بالزمان الشقلبي والله فظيعه
هذي الدنيا مشاكلها جسام وحيرتني=بعضها جديد ماله حل بنصوص الشريعه
إن رضخت لكلها جنيت وإلا فقرتني=وإن تركت لكلها صارت حياتي مستبيعه
علموني فهموني عن ليالي غررتني=طعتها في حال لو النفس ماهي مستطيعه
مثلها مثل الهنوف اللي هويت وشيبتني=بشرتني بالوصال وباشرتني بالقطيعه