يا الله إني طالبك وأنت الأمل=رد لي عقلي ترى الخلة تروع
رد لي خلي قبل وقت الأجل=البعاد يسم والفرقا تلوع
بعد غاب اللي من الزين إكتمل=وإكتمل بالذوق مجمول الطبوع
صابني بعده من الضيقة خلل=إنحدرت من القهر عقب الطلوع
صارت الأحلام صايبها شلل=ما تحرك لو شعلت لها شموع
ما بقي ما هو نقوله للغزل=غير ونة زلزلت حدب الضلوع
كنها تفجير دمر تاج محل=راح فيه من البشر عدة جموع
عقبت بالصدر ضيقة والزعل=خرب التفكير من كثر الجزوع
الشعر ما عاد بالمعنى جزل=والمشاعر تايهة حول السبوع
من نهار السبت صايبني ملل=والأحد وإثنين وثلوث وربوع
ورد شعري في شعوري إضمحل=كيف ينبت ورد من ساقي دموع
لا ذكرت اللي مثل ذوب العسل=قاطعٍ(ن)وصلي ولا كان بقطوع
كن قلبي من عروقه إنفصل=المواجع حاوية من كل نوع
ودي بقربه ولكن ما حصل=حالت الأقدار من دون الفروع
ما نفعني لا كلام ولا عمل=لا قدرت اصل ولا قاوي رجوع
الهنا من دنيتي عقبه رحل=والهموم أكوام للونة فزوع
يا الله إني طالبك وأنت الأمل=رد لي عقلي ترى الخلة تروع