أتعبتني يا وقت بالجزر والمد=بين الرجاء والياس رايح وغادي
وأحلام عمري مالها بالفكر حد=تجمح جموح الخيل من غير حادي
ودي و ودي والهواجس بلا عد=والحظ شاين والوجع في فؤادي
لا من ذكرت الحال والظرف والبعد=من دون مشهى القلب حالت حوادي
قد أيش أعد من المواجع بلا عد=العمر يركض والوجع فيً زادي
لو كان مابي في جبل صار منهد=لكن مابي كاتمه من عنادي
خايف من الشمات ومصفق اليد=اللي يدور طيحتي من شدادي
يا مشتهي تشمت على معرب الجد=البس على فرحتك لون السوادي
أنا قبل لا تعرف البخل والمد=الله جعلني في زماني قيادي
ماني على شرواك يا لاش منحد=أنا رجل ماني من الناس عادي
حطيت من دونك لسدي مية سد=ما فيدتك غير التعب والسهادي
ارتاح ماني خابرٍ(ن)بالهبل جهد=لا ترتمي بالنار تغدي رمادي
ماني بخابر فيك ذمة ولا عهد=يا ملتبس للكذب في كل نادي
لا تدعي بالود يا ناكر الود=فعلك وقولك شاهدة بالنكادي
المر طعمه غير عن حالي الشهد=يا ممتدح بالخير والشر بادي
ولى زمان المزح يا طالب الجد=ما عاد لك بالقلب مشرب وزادي
أتعبتني يا وقت بالجزر والمد=بين الرجاء والياس رايح وغادي