الحمد لله ربٍ(ن)بالعطايا كريم=يعطي بلا من من فضله بليا حساب
الله وهبنا تميم الله يحفظ تميم=يجعله صالح وحافظ للتقى والكتاب
أخو لعبد العزيز بن العزيز الحشيم=يالله تهني عيالي بالرضا والشباب
تصير لأخوك كنك مثل خي الكليم=موسى وهارون قدوة يارفيع الجناب
يا مرحبا يا تميم اهلا هلا يا فهيم=قدامك المجد كله يا حفيد المهاب
جيتك نعمة كبيرة من عظيمٍ(ن)رحيم=الواحد اللي بجوده لن عطا ما يهاب
إختار من بين خلقه للرسالة يتيم=وأنطق لعيسى وهو طفلٍ(ن)بقول الصواب
قادر بجوده تظلي ياتميم الزعيم=بيداك ربط الرقاب ومنك فك الرقاب
تمشي على منهج الجدان نهجٍ(ن)قويم=اللي لهم تتعب العربان سوق الركاب
تاقف مع الحق ما ترضي لراي العديم=اللي يدور لشقر الصف بين الحباب
ما تنشغل بالردايا بالزمان البهيم=اللي يسوق المفاسد ما لها من عقاب
ولا تنشغل عن رضا ربك بفتنة حريم=اللي وصفهن رسول الله بجلب الخراب
يابوك خلك سليم وبالطريق السليم=لا تلتفت للذنوب ولا تطارد سراب
القلب يابوك يصبح بالمعاصي سقيم=لو كان زان الطعام وزان لبس وشراب
العز فيدة زعيم ولا يجيبه غشيم=والذل مكسب ردي ما يحتزم بالحراب
الحمد لله ربٍ(ن)بالعطايا كريم=يعطي بلا من من فضله بليا حساب