سلمت من عبدالمجيد وطحت في عبد الصمد=يالله تخارجني من الأيام ما اكثر شرها
إن جئت بصبر ضاق صدري وإن تكلمت انلهد=والجمرة اللي خلف حدب العوج زايد حرها
واكبر مصيبة تكسر الرجال فرقا من يود=البال يكدر كان روحه فارقت من سرها
ما يستفيد إلا العواذل كيفهم شر وحقد=بالذات لا طاح العزيز اللي بطيبه ضرها
وإلا محبين الشماتة والنقاقة والحسد=اهل النفوس الواطية اللي زماني غرها
لكن ياراسي ما دامك مرتكز مثل العمد=واصل شموخك لا تفكر بالليال وكرها
لا تشتكي للناس مابه واحد ٍ(ن)ينع لأحد=ترى العزيمة للمشاكل يا سنافي سترها
حياتنا تمضي تجارب مالها عد وعدد=وبعض التجارب بالليالي مير لله درها
اللي مضت واللي بعد ما شفتها غم وسعد=مكتوب فوقي قبل ما ارحل بالزمان امرها
واللي كتب ربي علينا لا حصل ماله مرد=يالله لا تحرم نفوس ٍ(ن)ترتجيك تبرها
تغفر لها فوق التراب وتحت مدفون اللحد=لا صارت الأجساد مرهونة بمظلم قبرها
والخاتمة يا قاف شعري بالقصائد إقتصد=لا تندفع خلف الهموم اللي فؤادي فرها
خل البقية تنكتم بالصدر من مر وشهد=حياتنا لا بد ندفع قبل نرحل مهرها
ماهي بتصفي وإن صفت لأيام ترجع للنكد=دنيا تقلب حلوها ماهو بغالب مرها
سلمت من عبدالمجيد وطحت في عبد الصمد=يالله تخارجني من الأيام ما اكثر شرها