عطوني من أنفاس الفجر ما يقيت الروح=
ترى الروح من طول الســـهر حيل تعبانه=
سنين العمر تمضي وأنا بالســهر مطروح=
وروحي على اللي مسهر العيــــن ولهانه=
ياعين السهر وش تالية سهدك المفضوح=
ليا صــــار من ترجين راحت به أشـطانه=
طويل السهر ياعين زاد الجروح جروح=
ولا جاب لك من هو تنوحين من شـأنه=
مغير السهد والدم جوف الوريد يفوح=
وعزف اللحون اللي من الحال سهرانه=
أسج الهجوس بكل فجٍ(ن)بلا مصلوح=
وهم الهجوس بداخل القلب بركانه=
ياليل السهر صمت الدهر ماكسره البوح=
مادام المشاعر بأجمل الصبر مليانه=
بساهر نجوم الصبر مع شعري المملوح=
لعل القصيد تريح لقلبي الحانه=
تقافى ليال العمر واللي بقى بيروح=
وحلم العمر مستعمر البعد لأوطانه=
نصيب الخلايق كلها منكتب باللوح=
وأنا واحدٍ(ن)من خلق ربي وبإحسانه=
عطاني من أنفاس الفجر ما يقيت الروح=
وروحي من أوجاع الســـهر حيل تعبانه=