الله يقطع للسفر مع سنينه=لو كنت داري كان والله مختار
اليوم حال البعد بيني وبينه=أنا بدار ومشغل البال في دار
سافرت والدمعة بعيني وعينه=دمعة وداع جابها ذكر الأسفار
ياليت كفي لامستها يدينه=قبل السفر يمكن تخفف من النار
لكن أنا ويني وهو بعد وينه=حل السفر وصار للقلب ما صار
حان الشقا ما عاد فيها سكينه=أنا وهو نمشي على كف الأقدار
ياصاحبي قلبي تزايد حنينه=وأنا الذي أحسبه بالبعد صبَار
يرجف بصدري مثل رجف المكينه=آهات صدري كنها صافر إنذار
يا الله يا رحمن قلبي تعينه=جار الزمان وفوقها صاحبي جار
يا صاحبي القلب ما ضاع دينه=حتى ولو طافت على فكري أفكار
والقلب لا منه تزايد ونينه=يصبح خطر محسوب من ضمن الأخطار
لكن أنا بصرفه بقسوه ولينه=بنقش على وجه الزمن بعض الأخبار
يا قلب دامك صرت عنده رهينه=خلك وفي وأكتب على الوقت تذكار
خلد على وجه الزمن في جبينه=قصة زمن حتى يجفن الأحبار
الشعر فن وذوق والعقل زينه=أكتب على شانه دواوين الأشعار
كل شيء يزين لا جا بحينه=حتى الشعر يجمله عزف الأوتار
وختامها صاحبك حذرا تدينه=يمكن حداه الوقت وظروف وأقدار
خلك وفي وإرضى بزينه وشينه=دور عذر لو كان ما عنه أعذار
لو هنت في عينه حذر لا تهينه=لا تكون تحسبها بمكسب ومخسار

الـشـعــر فــــن وذوق والـعـقــل زيــنــه=أكـتـب عـلـى شـانـه دواويــن الأشـعــار