الو هلا بك مرحبا كيف الأحوال=بداية(ن)منها دخلنا متاهات
من بعدها ما راق لي بالزمن بال=أبيع وأشري فيه لكن بسكات
أشغلت جوالي وعنيت مرسال=حولت شعري والقصائد مسجات
صرت أفرح برنته لا رن جوال=ومن اللهف قلبي تسارع بدقات
ليا ذكرته صار بالفكر ولوال=وليا نسيته بكسر الصمت بأهات
ما كني الا صابني مس وهبال=أسهر طوال الليل لأجله ولا بات
مر أتوسل وأترجاه بوصال=ومرار أقل له هاك ما قلت له هات
يا وردة أيامي نبا قولك أفعال=اروي بها روحي بدال الحكايات
سحائبك برق ورعد سيل ما سال=وأنا صحاري وأنتظر منك زخات
هلي علي الوبل هليه همال=أسقي غصون(ن)من سمايمك يبسات
لا تتركيني بين حل(ن)وترحال=يكفي عروقي منك لو بس قطرات
قطرات جودك تعْدل اليوم شلال=العمر يمضي والفرح بس لحظات
كثير قبلك مر والقلب ما مال=إختاركِ(ي)من بين كل الحسينات
فيك(ي)لقيت أحلام للعمر وأمال=كانت تراودني من سنين ما جات
أدب ..ثقافة..علم..وأرق الأقوال=وصائف(ن)مهي بكل البنيات
والزول تحفة نادرة بين الأزوال=تغار منك صورتك بالمرايات
هذا الذي ملك فؤادي ولا زال=في كل يوم يزيد حبه رساخات
تذوب روحي فيه لو كان مانال=الا طيوفه كيف ما راحت وجات
عقب غرامه بالمعاليق زلزال=ثورة براكينه قصائد عذيبات
هي منبع أشعاري ليا قلت الأمثال=منها وفيها بالقصائد علامات
عشقي لها من جد ماني بمحتال=طاهر نقي ما فيه بعض السخافات
كني مقيد في غرامه بسلسال=مقدر على كسر القيود العتيات
صحيح من حبه تغربلت غربال=لكن في حبه لقيت الملذات
إن غاب عني يوم كن الزمن طال=أحسب غيابه عمر لو كان ساعات
تعانقت أرواحنا والزمن حال=عسى القدر يجمع قلوب(ن)شقيات
وإن راح عني والزمن فوقنا عال=بدعي لها في كل خطوة سلامات
ببني لهافي ساحة القلب تمثال=يبقى لها ذكرى وللقلب بالذات
بكتب علاه الحب والعشق قتال=شوفوا قليبي كيف بسبابها مات
قلبي ذبح قلبي ولو كنت مغتال=هذا غرامي والهوى فيه لوعات
غرام روحي داخل القلب منشال=مبدله يفرح على الخل شمات
أدراه وأداريه عن شوف الأنذال=اللي تفرق للقلوب الوليفات
لو شفت منهم لوم خبثين الأعمال=بسد باب اللوم هيهات هيهات
ماني مطاوع هرج حاسد وعذال =بعد وهبت الروح عند البدايات
كانت بدايتنا هلا كيف الأحوال=لكن مدري وش تكون النهايات

المشاركة الأصلية كتبت بواسطة السحـ فوق ــاب (المشاركة 24217) صح لسانك وسلمت يداك على ماسطرته لنا الله يعطيك العافية لك كل التقدير

المشاركة الأصلية كتبت بواسطة الــذيــب (المشاركة 24221) صح الله الساااانك وبيض الله وجهك قصيدة في قمة الروووعـــة لك أرق الــتــحـــايــا

المشاركة الأصلية كتبت بواسطة القنـــــاص (المشاركة 24222) الله الله ابداع صح لسانك وعلا شانك قصيدة تعد من الطراز الاول مبنى ومعنى لك كل التقدير

المشاركة الأصلية كتبت بواسطة ROUMAN (المشاركة 24224) بارك الله فيك وتقبل مروري واحترامي