تمخطري يا قصيدة زان معنى القصيد=ما عاد لك عذر في معنى ولا قافيه
غوصي بحور القوافي واطلعي بالجديد=خلي فؤادي يحس بريحة العافيه
من عقب عود عليًه من سكن بالوريد=شفا عروق المحبة والله الشافيه
اليوم عندي رجوعه بالسلامات عيد=يا مرحبا يا هلا يالدرة الصـافيه
إرقي بعرش الخفوق اللي بحبك سعيد=تنعمي في مشاعر صادقة دافيه
هذا مكانك بقلبي ما نزل فيه سيد=ينطر مجيك بشوق وللعهد وافيه
ما غيره يا غناتي في غيابك شديد=باقي على ما خبرتي والهوى مافيه
حكم خفوقٍ(ن)تولع فيك والحب قيد=واللي لقي من غرامك يا غلا كافيه
ما أريد غيرك ولا يرتاح قلبي لغيد=أنتِ(ي)وبس بحياتي نعمةٍ(ن)ضافيه
فيك الحسن والدلال وفيك ما هو بريد=يا جنة العشق يا بسمة عُمر لافيه
زيدي محبك محبة مطلبه بالمزيد=يا منبع العشق كله بين وخافيه
رصيد حبك بقلبي زودي به رصيد=وحساب حبك بقلبي سر ما إنشافيه
ما يعرفه غير ذاتك بعد رب العبيد=اللي عن الخلق عينه ماهي بغافيه
تمخطري يا قصيدة زان معنى القصيد=ما عاد لك عذر في معنى ولا قافيه