هواجيسي بميدان الفكاير=بنات الريح في وقت الطرادي
مثل شهب الليالي بالتطاير=تقادح بالفكر قدح الزنادي
تذكرني زمانٍ(ن)صار غاير=زمانٍ(ن)فات لا يمكن يعادي
يدور الوقت والدنيا دواير=حداني عن مراد الروح حادي
على حسب العوايد والسواير=حداني حظ وظروف البعادي
عن اللي صار منه العقل طاير=وعقب جرح في داخل فؤادي
بعاده منه صار الدم فاير=وضيعت الرزانة والرشادي
يزور الروح من ذكراه زاير=بدون أشعر يهون لها إنقيادي
ليامني ذكرته صرت حاير=يجافيني منامي والرقادي
أقض الليل بحلامٍ(ن)كباير=مع أطيافٍ(ن)بها غاية مرادي
أهون للكباير بالصغاير=ويحرقني جمر تحت الرمادي
لهيب الشوق سوى له دماير=بياض القلب عقب له سوادي
حكم فوقي بحكمٍ(ن)حيل جاير=ياجور الشوق ما تعرف حيادي
جرحت القلب وأهملت العباير=ولا شيءٍ(ن)من الأشجان فادي
هواجيسي بميدان الفكاير=بنات الريح في وقت الطرادي