يامرحبا مليون يا غالي الناس=اشرب لفنجال المجبة على الكيف
مليت لك من صافي الود للكأس=والنبض بعروقي يلج الغطاريف
فرحان بك يا نادرٍ(ن)بين الأجناس=هواك زاد القلب والروح تشريف
وأبشر بمطلوبك على العين والراس=يرخص لك الغالي من السِيف للسِيف
أمر تدلل فوق ذاتي و هوجاس=جيتك فرحة للضلوع الملاهيف
عاشت عروقٍ(ن)قبل عطشى ويباس=شوفتك فكت للسرور المظاريف
عاد الأمل من عقب ما خيم اليأس=على المشاعر والشعر والسواليف
ربع فؤادي بشوفتك عذب الأنفاس=عاشت عروقٍ(ن)ضامها لاظي الصيف
ياريحة الكادي ليا هب نسناس=ماكني إلا أمير مصيافي جنيف
معك يطيب الجو يا عذب الأوناس=لا من سمعتك صاب قلبي زفازيف
وده يضمك داخله غالي الماس=يحميك من حاسد وناسٍ(ن)ملاقيف
يا بسمة أيامي ويارقة إحساس=يا مغرقتني بالعطا والمعاريف
غلاك عندي جاوز لكل مقياس=وحلاك بعيوني يفوق التواصيف
كلي على بعضي من الحسن محتاس=وإحتارت بوصفك لحون المحاريف
لكن هلا يا مرحبا غالي الناس=اقلط بقلبي مجلسك والهوى كيف