لا ترتجيني بعد طول المغيبه=صدت مشاعرنا من الهجر والصد
ما عدت مثل أول حياتي رتيبه=محتار أميز مزح الأيام والجد
دنيا غريبة والمشاعر غريبه=حلم الليالي داخل القلب منهد
مصيبةٍ(ن)ياكبرها من مصيبه=باب الأمل في وجه الأشواق منسد
وإن قلت لي:حالتك صارت عجيبه=صدقت هذا منك يا ناعم الخد
لولاك ما صارت حياتي كئبه=لكن ذبحني طول رجواك والبعد
أيام وشهور وسنينٍ(ن)مهيبه=تلعبي أمواجك مع الجزر والمد
أخذت قلبي والمشاعر نهيبه=وتركتني فريسة القهر والوجد
راحت حياتي للمواجع حبيبه=تقطف لشوك الورد وتحيد الورد
مواجعي بعدك وربي رهيبه=لاهي تريحني ولاهي بتنرد
غليبةٍ(ن)يا شينها من غليبه=حلو الليالي جالها يا غلا ضد
أخذتك مني بعد كنتي قريبه=والله يعلم وشبقي بالزمن بعد
أيامنا والحظ صارت حريبه=وظروفنا ما صارت اليوم باليد
لا ترتجيني بعد طول المغيبه=صدت مشاعرنا من الهجر والصد