بالفيس ناسٍ(ن)شوهوا صفحة الفيس=حنا نقدر مير ما قدرونا
ما نعرف الصاحي ولا نعرف الهيس=عالم غريب وبعضهم يومرونا
مدري مرض وإلا وظايف دبابيس=يبون معلومة عسى يغدرونا
أحد مع الإخوان وأخر مع السيس=ثالث مع الشيطان جاله قرونا
أصناف ياما صايبتهم وساويس=على البشر ظلم وكذب يفترونا
لن شاهدوا خلة تدق المهاريس=تفرح بعيب الناس ما يسترونا
أخر قراراتي بدرسه تدريس=للعالم اللي بجهلهم طيرونا
ناس وهبناهم جميل الأحاسيس=لكنهم راحوا ولا عبرونا
باعوا بعد ربي عطاهم هراديس=بأهون وسيلة بعدوا وخسرونا
دورتهم واتعبت شعر وهواجيس=لكنهم تجاهلوا وأنكرونا
والليله أنا ناوي أفرغ الكيس=ببيع ناسٍ(ن)بالغلا ما شرونا
لقيت لي ناسٍ(ن)تحب النواميس=لا من نشدنا وينكم يشكرونا
الطيب فيهم فاق كل المقاييس=كل ما طلبنا حاجةٍ(ن)بشرونا
ماني براجي مدةٍ(ن)من مفاليس=اللي تناسونا ولا يذكرونا
مقفين والمقفي ترجيه تدنيس=تغيروا لكن ما غيرونا
بعلن عليهم حظر والعنك يا بليس=مثل مريضٍ(ن)جاه فايرس كرونا
مسحتهم سواة مسح القراطيس=ريحتهم وارتحت ما حيرونا
من دونهم حطيت حد ومتاريس=قهرتهم سواة ما يقهرونا
احلامهم بتصير بعدي كوابيس=هذا جزاهم يوم ما قدرونا
حمستهم سواة بن المحاميس=حظرتهم ما يقدروا يحظرونا
بالفيس ناسٍ(ن)شوهوا صفحة الفيس=حنا نقدر مير ما قدرونا