ياهيه ياللي مشغلتك المراسيل=مرسول ما يقضي لمرسول حاجه
أما تعال وسامر الشوق بالليل=وأشعل بليل الود شمعة سراجه
تعال زيح هموم ليلٍ(ن)مقابيل=يا ثقلهن والفكر فيه إرتجاجه
لا من ذكرتك والمشاعر محاميل=بأشواقي لشوفك هوى القلب خاجه
ونيت ونة تكسر ضلوع حلحيل=منها تهشم مثل هشم الزجاجه
وإن جيتني طابت بليلي تعاليل=فرد لها وجهي مسرة حجاجه
أنسى معك ما مرني من غرابيل=والقلب يرقص لك فرح وإبتهاجه
مشاعري تجيك عجله مداهيل=بالصدق ما فيها خلاف وعواجه
تزف لك من داخلي حب وتزيل=عني وعنك هموم وقت وخماجه
ملكتني بالحسن والطيب ياويل=قلبٍ(ن)تولع فيك والحب لاجه
يا سيد التلعات كافي بهاذيل=تعال عدل للمولع مزاجه
ليلي بدونك مظلمٍ(ن)حيل بلحيل=والوجد ثائر والقصائد عجاجه
غنيتها من لهف مابي مواويل=الشعر للمغرم يعجل علاجه
وإن كان ما طابت جروحٍ(ن)مغاليل=يجي لها لو بعد حين انفراجه
من عند ربٍ(ن)يجزل المد تجزيل=ربٍ(ن)ليا زادت مواجعك ناجه
ياهيه ياللي مشغلتك المراسيل=مرسول ما يقضي لمرسول حاجه