الله جعلنا شعوب وأقوام وأجناس=وأنعم على خلقه بفضلٍ(ن)جزيلي
حرك بنا الأرواح من دم وأنفاس=شواهدٍ(ن)ماهي بحاجة دليلي
أوجد بنا تفكير وشعور وإحساس=نعرف بها ما شان وإلا جميلي
من بعدها قالوا:ترى العرق دساس=مثل الزمن مابين يومٍ(ن)وليلي
يا متعبين لقب جمحات الأفراس=السيف ما يدمي ليا أصبح كليلي
ومن لا يشب النار في روس الأطعاس=خله لشيل الميَّ وقت الجفيلي
موت الكرامة خير من حنية الرأس=الرأس ما يرخيه غير الذليلي
لامن جبرك الوقت تستجدي الناس=صدة كريم ولا تمنن بخيلي
واللي يذل النفس لا بد ينداس=ناسٍ(ن)تبيع أرواحها بالقليلي
ماكل طيرٍ(ن)مثل ما قيل قرناس=ولا كل خيلٍ(ن)بالميادين أصيلي
قال المثل:ما أخبلك ياطابخ الفاس=تبا المرق والفأس مابه حصيلي
حتى الشجر عقب الطري يغدي أيباس=لو علها كل يوم وبل المخيلي
واللي بنا بنيان ما جود الساس=مهما عِلي ينهد ساسه هزيلي
تذكر كليب وكيف جندله جساس=جزاه يوم إنه ذبح للفصيلي
اللي وطى بيضات لاباسة الماس=الطفلة اللي ما نقضت للجديلي
قدحة شرارة ولعت واهج أقباس=غدى ضحيتها من القوم جيلي
أربع عقود الحرب تسقيهم الكأس=يا ما غدى بأسبابها من قتيلي
دنيا تقلب بين قومة ومجلاس=ولا بد من عقب النزول الرحيلي