خمر الغلا

البارحه سهران بسباب عايق = عاق العيون تشوف عين المحبين
وش لون أنام الليل والصدر ضايق = وش لون ينمو نبت همَاله البين
غاب الحبيب اللي له الحسن لايق = غايب عن الانظار نور المزايين
محتاج اضمه فوق صدري دقايق = تشرح فوادي ضمته داعج العين
ما نامت الاعيان والشوق سايق = سرى بقلبي وين مدري على وين
سرى بروحي بين كل الخلايق = صوب الديار اللي بها كامل الزين
بدر البدور مفرجه صدر ضايق = برق الحيا تزهر بغيثه بساتين
صافي هواء الخفاق والفكر رايق = ريح النفل لا فاح مع ريحها شين
خمر الغلا ما منَه القلب فايق = يجري سواة الدم وسط الشرايين
زرع الفواد إنظام صابه عوايق = محتاج قطره من شفاة المداوين
العين تذرف من لهيب الحرايق = شبت حرايق احرقت نابت الطين
البارحه سهران بسباب عايق = عاق العيون تشوف عين المحبين