توقعتك صدقتي في سوالف لي قلتيها!!!=لكني ما توقعتك مثل غيري شعرتيني!!!
على قول المسولف صح بالميه حبكتيها!!!=وأنا من طيبتي صدقت وأنتي ماجبرتيني!!!
لكن الله نقض كل الحبال اللي فتلتيها!!!=فضح ملعوبك وبانت سواليفٍ(ن)غمرتيني!!!
كشف ربي قناع الزيف لوجيهٍ(ن)سترتيها!!!=تذكرتي قديمك وإنسيت ولا ذكرتيني!!!
مشاعر كنت واهبها بذا الفعله قتلتيها!!!=خسارة ليش بعد الطيب واخلاصي غدرتيني!!!
تعودتي على النكران لأحبابٍ(ن)عرفتيها!!!=مزاجية مثل ماتنكري غيري نكرتيني!!!
على ربك جزاك بكل فعله بي فعلتيها!!!=ولاني مرتجي منك وهايب لو شكرتيني!!!
على قول المثل قدام لا تصلح خربتيها!!!=بغلطة منك في قبر التناسي تو قبرتيني!!!
عميتي عينك بيدك وعينك ما كحلتيها!!!=أنا ماني بمن يبقا بجوك لن حقرتيني!!!
وأنا ماني بنادم فوق لحظاتٍ(ن)عرفتيها!!!=ما دام إني نقي ما يعيبني لو هو طريتيني!!!
ولاني هادم أحلامك ليا منك بنيتيها!!!=ولاني فاضح أسرارك ولو إنك عذرتيني!!!
سجلات الوفا في متحف الذكرى ركنتيها!!!=وسجلات الجفا عنوانها بعده نشرتيني!!!
على الله قصتك وإياي مثلي ما نسيتيها!!!=سبرت أغوار ذاتك وإقتنعت ولا سبرتيني!!!
تعديت الشباك اللي على دربي رميتها!!!=أموت بعزتي شامخ ولا أحسك أسرتيني!!!
تلاقينا بلا ميعاد لأيام وقضيتيها!!!=ودارت دورت الأيام وأخذت ما نذرتيني!!!
بأمان الله وتلقي خير بعد إنك نهيتيها!!!=طويتي صفحة الأيام يوم إنك خبرتيني!!!
بقفل للبيوت اللي بنيت ولا سكنتيها!!!=وأداوي للمشاعر واحمد الله ما سحرتيني!!!