حيا الله اللي يغيب أيام ثمٍ(ن)يعود=يرمي سهوم العتاب اللي زواريقها
تدمي عروق الخفوق اللي عليه القيود=قيود تجذب عروقه من معاليقها
إن جئت رحب وهلا ما ذخر من جهود=وإن غبت روحي عليًه يفتري ضيقها
يا ملهم الروح ما تهوى بهذا الوجود=لولا غرامك جروحي قل تعميقها
أنت الهوى والدوا ماني لجودك جحود=في قربك النفس ترفل في توافيقها
قصائد الشعر في عشقي لحسنك شهود=عيون شعري بذاتك زان تحديقها
وهبت لك من حشايه للمحبة رفود=والنفس في كل ذاتك زاد تعليقها
من جود روحي وهبتك جود يا راع جود=تستاهل الروح يا حبي وتغريقها
هذا أنا في غرامك لين صك اللحود=لو الأماني ظرف الوقت بتعيقا
لا تتهم للمشاعر بالجفا والصدود=سياسة العشق لا تنقض مواثيقها
والله والله ما خون الهوى والعهود=ما دام روحي تحس وتبتلع ريقها
غرامي اللي تعرفه ما للهفه حدود=نوعي من الناس ما تنسى معاشيقها
وشلون بنساك يا حلم الجهر والسدود=منك القصائد تزيًن في طواريقها
أقسمت لك من سنين إنك لقلبي وقود=أحلام عمري ياعمري منك ترويقها
والعمر ينقص وشوقي والمحبة تزود=أقدارنا في هوانا بان تطويقها
أيامنا والليالي بين بيضٍ(ن)وسود=قامت تقلب علينا صعب تفريقها
تصفي سويعات والباقي سمته النكود=قانون الأيام ما نقوى لتمزيقها
يا عل وقت النكادة والنكد ما يعود=تصفي وكل الحلوم يهون تحقيقها
حيا الله اللي يغيب أيام ثمٍ(ن)يعود=يرمي سهوم العتاب اللي زواريقها
تدمي عروق الخفوق اللي عليه القيود=قيود تجذب عروقه من معاليقها