يا هوى البال روحي ما تمنى سواك=انت غاية مرامي وانت غاية مناي
ليت حظي يجود بساعة في لقاك=خير من عمر فات وخير من عمر جاي
يا ملاك(ن)بقلبي ماش غيرك ملاك=مالك ٍ(ن)للمشاعر ياعطر مشتهاي
لو الأحوال جادت لي بساعة معاك=كان ما قلت ويلي وين بلقى دواي
الليالي تمر وشوكتي مشتكاك=يا بعد كل حي ويا مناي ورجاي
ما تحقق مناي ولا تحقق مناك=أخبث أيام عمري وأنت مانته معاي
الغرام إبتلاني يا غلا وإبتلاك=وقام يكبر بلاك وقام يكبر بلاي
ما تطيب المشاعر لين تاخذ دواك=وإن تعذر بموت بحسرتي يا هواي
واكبر اللي يعورني وعزة غلاك=يوم تطلب مطاليبك وتقصر يداي
اشعر إني صغير بعين قلب(ن)يباك=لا حداني زماني ثم قلل عطاي
يا بعد كل غالي صعب والله جزاك=أنت سبًاق بالمدات يا مبتغاي
يكفي إنك تقول الشوق حرًق حشاك=آه لا قلتها يكبر بروحي عناي
والله إني لموت وما تبدل هواك=وين ما كنت كنه قطعة(ن)من سماي
أنت حبك تملكني عساني فداك=حاكم(ن)للفؤاد اللي سكن في حشاي
ما سكن به عزيز بمنزلة مستواك=بابعد نبض قلبي ياقمر في مساي
منيتي في حياتي يا غرامي رضاك=ياعسى الوقت يسمح ياعساه وعساي
والله إني لأبل الروح من نبع ماك=وأروي اعروق روحك من صفا نبع ماي
دنيتي ما تزين إلا بطيب صفاك=وإن تعكر صفا دنياك عكر صفاي
منك علة شقاي وفي علة شقاك=يا هنايا بذا الكون مدري شقاي
الله إنه يعجل لي ببلسم شفاك=والله إنه يسرع لك ببلسم شفاي
يا هوى البال روحي ما تمنى سواك=انت غاية مرامي وانت غاية منايِ