ليتني أقدر أحقق لك مناك=وأتخلى عنك لا منك بغيت
مير أنا والله ميت في هواك=والله إني ما أتركه حيٍ(ن)وميت
إنسي بكيفك أنا عندي غلاك=كل يوم يزيد مثله ما لقيت
ما شغل للقلب ياروحي سواك=مثل ما قالوا من الحب إستويت
حلو حبك يا شبيهه للملاك=عنك لحظة في حياتي ما سليت
ما شغلني بالبشر هذا وذاك=ما شكيت إلا لذاتك لن شكيت
قلبي الموجوع ساعة ما نساك=وإن نسيتي يا غرامي ما نسيت
كم ليلة قلت لك :روحي فداك=وكم ليلة من مواجيعي بكيت
وكم ليلة قلت لك:يسعد مساك=يا غناة الروح غيرك ما هويت
في خيالي أسمع لهمسة نداك=وأسمعك بالحلم لا مني غفيت
كم تهت بعالمك وأعشق حلاك=فوق جمر الشوق ياشوق انشويت
صرت نجم معلقٍ(ن)عالي سماك=مير ذا الليلة من المطلع هويت
ما هقيت إن الزمن يسرع خطاك=والله إني يا غلاتي ما هقيت
كيف قلبي بعد بالنبض إشتراك=تذبحينه بعد بيدينك ضويت
سوي اللي يسعدك والله معاك=لا تقولي:كان ودي ما قويت
جودي طعنتك لا ترعش يداك=دام ظني خاب ياعمر إنتهيت
الحبيب اللي تمنيته جفاك=ما يفيدك يا عمر ياليت ليت
لو ليت تفيد حققت لمناك=وأتخلى عنك لا مني بغيت