قرب سنة والرقم صامت ومقطوع=مدري جفا والا خلل باتصالك
والا حداك ظروف راغب وممنوع=ياليتني أعرف مغير حوالك
العام كنت تقول لي حدي إسبوع=وإن طالت المدة تخاف المهالك
واليوم روحة واضحٍ(ن)مالها رجوع=أكيد لاقي جو غيري صفا لك
ما تدري إن الود بالقلب مطبوع=قلبٍ(ن)يودك في غيابك دعا لك
الود الك في داخل القلب مزروع=لا يمنعك الا قلايل وصالك
ماني مجازي هجر بصدود وخنوع=ولا تحسبن القاع لي والسما لك
أنا عن الزلات والشين مرفوع=درب الردا م أمشيه لو كان سالك
شامخ شموخ طويق في عين جربوع=ملك ولو إني بليا ممالك
ما تهزني ياريح ماني بمفزوع=ما دامني للأصل والعز مالك
في داخلي حصنٍ(ن)من الطيب مصنوع=وفي خارجي نورٍ(ن)شرق وإنتحا لك
أصعب من الحِبة على نابي الكوع=وأسهل من الفكرة بجامح خيالك
ياللي قطعت الخط لو شفك تروع=أنا على ما كنت يا حي فالك
أعاتبك وأنا كما كنت شعشوع=أرغب وصالك وأتمنى دلالك
الشك ما بين المحبين مرفوع=والعُتب صابون القلوب لمحالك