يهناك نومك نام ياعذب الأوناس...=خل السهر لعيون تعشق سهرها...
أنته فراشك من حراير ومن لاس...=وأنا فراشي نار شوقٍ(ن)شررها...
الهب لصدري لين ضيق للأنفاس...=من حرقته عيني تسابق عبرها...
الليل كله طرف الأعيان ما هاس...=هواجسي بالفكر ساطع قمرها...
كل ما سرى هوجاس جاني بهوجاس...=زود على روحي كدر مع كدرها...
ما كن حولي من هلي أقرب الناس...=كبدي بعادك يا حبيبي فطرها...
ما عاد يهناني منامٍ(ن)ومجلاس...=نفسي غرامك والتجافي كسرها...
غدى فؤادي مثل بنٍ(ن)بمحماس...=تقلاه نار الشوق حبك جمرها...
غلب على روحي بعد غيبتك يأس...=يا نبض روحي والعيون ونظرها...
أدري بحبك لي لكن وسواس...=يلعب بروحي لين يأسي غمرها...
أخاف للأيام يبعد وأحتاس...=أيام غداره ولا أمن خطرها...
وأخاف من كيد العواذل والأنجاس...=اللي توزع للخلائق قشرها...
أخاف يسقونا من أحقادهم كأس...=كأس الحسد أنفس كثيرة دمرها...
الله يكافي كل حاسد وبلاس...=يقطع لدابرهم ويمحي سيرها...
وختامها يا عالم بنبض وإحساس...=تلطف بروحي حين ياتي قدرها...