الله يجزى للظروف بخير=اللي جمعتنا بالزمن صدفه
لحظة عمر ما جابها تفكير=صارت بكفه والعمر كفه
يازينها من حزةٍ(ن)بعصير=حين التقينا بأول اللفه
رقصت قلوب الحب رقصة طير=مذبوح يرقص لاقيٍ(ن)حتفه
صارت حياتي من بعدها غير=أخرج من اللهفة على لهفه
مشتاق لك والعقل كاد يطير=مشاعري تشعله وتلفه
ودي بشوفك والكلام يثير=لا من سمعته منك بالشفه
يعصف بروحي عاصف المعصير=والشوق يمك فكري يدفه
مهما يكون العذر والتبرير=الوجد نار وبعدك يهفه
القلب كنه داخله تفجير=مواجعه والحب مصطفه
إلى متى بقوى على التصبير=بعد الرزانه صابني خفه
الحب فطر خافقي تفطير=أشواق حبك ريحها صلفه
ما عاد ينفع للعنا تخدير=صوبك سيول الحب منجرفه
ليت الزمن نقدر وراه اندير=ونثبت الساعة على الوقفه
بنفس المكان وساعة التسيير=نأخذ لنا بعد السهر غفوه
واللي كتبه الله لزوم يصير=ياكامل الأوصاف والعفه
أدري وتدري ما بها تقصير=لكن ظروف الوقت منحرفه