البارحه سهران وأعد النجوم=كل النجوم السامرة عديتها
ساري مع الهوجاس ماحسيت نوم=أشيا كثيرة بالفكر مريتها
ذكرت بالدنيا سواليف وعلوم=سمعتها والا قبل سويتها
حقائقٍ(ن)قفت مثل مقفاالحلوم=بأيام عمرٍ(ن)بالزمن زليتها
ذكرت ناس أغراب وأحباب وخصوم=ما باقي إلا ذكريات أدميتها
من كثر ما تطري عليه كل يوم=ياما المدامع فوقهم هليتها
لا من ذكرت أبوان وأخوان وعموم=طوى القدر لنفوس ما مليتها
وذكرت ناس شيوخ ورجالٍ(ن)قروم=ياليتهم ما كان راحوا ليتها
وذكرت ناس نعدهم صف الرخوم=ما تنتخي لا يبعث الله ميتها
وذكرت ناسٍ(ن)باللوازم ما تقوم=تجمع حطام الوقت خايب صيتها
وذكرت رحلاتي على متن الغيوم=وذكرت مداتٍ(ن)قبل مديتها
تقافت الأيام دنيا ماتدوم=ليا كشرت بالناب يخرب بيتها
سهم المنايا غير عن كل السهوم=دنيا غرور ولو بعد حبيتها
تسلبك حتى ما عليك من الهدوم=ما تملكه تأخذه لو ما أعطيتها
مافيه فرقٍ(ن)بين حاكم ومحكوم=تنهد فوق الراس لو عليتها
والباقيات الصالحات الله رحوم=وأعمال خيرٍ(ن)بالعمر سويتها
يالله تجعل قسمنا خير القسوم=تقبل صلاتي كل ما صليتها
من عقب ما غابت سواريت النجوم=هواجسي عند الفجر وطيتها
أعجزني الفايت وعاجز بمعدوم=بعد النجوم السامرة عديتها