لاصرت شاعر سعودي بس ومفوّه=اكتب قصايد وخل الناس يقرونك
حبكاُ وسبكاً تجي بالغصب والقوّه=باسلوب رايق على كيفك ومضمونك
امطر على ساحة العشاق برهوّه=وامطر على قلب معشوقك ومجنونك
هملل عليهم مثل هتان من نوّه=اسق الكبود العطاشا جر دلعون
مادام شاعر وعاشق ماتبي سوّه=ومادام محبوب قلبك ينثني دونك
اللي غرامه تغلغل داخلي جوّه=بين الحنايا وانا لبيت ياعونك
ياواحة الشعر والتفكير وزهوّه=يادبلجة ترجمة تنسيق مسكونك
يافكر بن عسكر اللي شب لك ضوّه=ويابرق ليلٍ لمع من طارف سنونك
عرق الهوا في خفوقي شدّه ولوّه=شدّه ولوّه وانا يازين ممنونك
ياباشة الغيد ياطرقا ومحلوّه =مالوم خالك وعمك لو يحبونك
جمر الهوا في خفوقي نار محموّه=ارفق على قلبي اللي صار مفتونك
ياملهمة شاعرٍ لاهام في جوّه=شطب على أهل الجمال وقال يفدونك
والشعر لجلك يجي واطيه لعلوّه=والغي هل الشعر في بيتين لعيونك
مادام بيني وبينك دم وحموّه=وعلوم قوم وعزاوي قلت ياعونك
بس التفت لي وجر الصوت بهدوّه=قل جعلها الموت ناسٍ مايدانونك
واسق الحنايا وقلبي بالهوا روّه=وامك وابوك انسهم لا صار يدعون
خلك معي دام نفسك صدق مبلوّه=وادمج حياتي وكوني في نهر كونك
ولا صرت ناوي على المسرى فقل توّه=توّ القمر يرسل خيوطه على هونك
بجلس معك دام نفسي فيك مطلوّه=المشكله خايف أهلك لا يصيدونك
لن المعاليق لك بالحب مملوّه=واعضاء جسمي من الزله يصونونك
حب بدوييٍ عفيف يخاف من سوّه=ماهو بحب حضرييٍ طاش بجنونك
حبيت أنوه بحب البدو وأنوّه=ياجعل جيلك من الخفرات يفدونك
اللي لهم بالهوا نخوات ومروّه=يرسمك بالذاكره ويفز لطعونك
اصلاً لمني نويت اخرب الخوّه=قصرك محصن وجيشك واقفٍ دونك
تدري وش اخر كلامي ماتبي سوّه=والله يصبر حنايا قلب فرعونك