ياسلامي وابالعب لين نور الصباح= وارجم ابليس واوخيه بحتة حصاه
الجبل ماتهزه عاتيات الرياح= ثابت(ن) في شموخه لو هبت علاه

مرحبا واطلب الله ياسعد فالصلاح=انت رجل متعلم ماتبالك وصاة
كل حي(ن)يموت وكل ضلع يزاح=والبقا لله اللي معتلي في سماه

البقا والصدر يالذيب فيه انشراح= من عطاني بنص الكف ياخذ ملاه
صح ماقلت ماهو من قبيل المزاح= عارفين الكتاب وعارفين الصلاه

انت يوم القوافل لبستك الوشاح=رحت عنها وخليت القوافل فلاه
ماسمعنا يكود الحمحمة والصياح=والبلا كيف تفهم من حفاة وعراه

الله اللي عطاني بعد جهد وكفاح= ماقفي واحتميته يوم مااحد(ن) حماه
انت تشرب ولاتطعم هماج وقراح= الجمل ياجماعه علته في كلاه

بالهنا والعوافي ياصبي الفلاح=مار رحتوا نحاه وشغلكم في نحاه
قبل عينك تنام وقبل سرك يباح=التجاير بعضها ماوراها غناه

الله انه يعافي من يريد النجاح= ابك مارحت انا عيني علاه ووراه
العرب ياوسيع العرف جاها شفاح= واكثر الناس يبغانا نبيح خفاه

انت راعي شداد ومحتزم بالسلاح=مار رديت سيف المعرفة في خباه
من بغا النصر يصبر فوق زرق الرماح=لا يخلي صبي القوم ياخذ هواه

اطلب العز وابعد عن دروب المطاح= والكبوش السمينه مالها الا الذكاه
سج رجلك وسافر فالفجوج الفساح= والعدو شد حيلك لين تقلع مداه

بعد ماذقت من يمناي سم (ن)ذحاح=ما لراسك نجاة ولا لمثلك حياة
الظوامي تصدرها العدود القراح=والهزيلة نذكيها بجنب الصفاه

قدركم من قوي النار بالنار فاح= الضعيف تجنن من خلاه بخلاه
في نهار ضرمه مانسمع الا الضباح= ياشروق ضرمه خشو بكم العباه

زبدكم ياسعد مع شرقت الشمس ساح=واعنا من تحرى خيركم واعناه
ما لكم ساعة الشدة مجي ومراح=لا نصرتوا ضعيف ولا سندتوا غزاة