البارحة سجيت مشعوف الفكر=على جواد الحلم وأطلقت العنان
طاف الجزيرة بدوها مع الحضر=وأصهل بساحة قصر طلقين اليمان
ترجل الفارس لميدان الشعر=بيقارع الفرسان ويجيد البيان
من هاجس مخزون في جوف الصدر=ممزوج من حكمة مغطيها جنان
أصعد جبل وأغوص في غبة بحر=مرٍ(ن)قسا وأحيان يركن لليان
مع شاعر ماهو مثل باق البشر=متمرسٍ(ن)بالرد ويجيد الطعان
سهرت أنا وإياه لا وقت الفجر=والكل منا وده بكسب الرهان
قال:أنت من وقلت:أنا ثاقب نطر=كانك تميز والك في راسك عيان
أنا القدر لن كان تؤمن بالقدر=مكتوب فوقك من قديمات الزمان
أنا عدو الضيق وجروح وقهر=أنا فلان بن فلان بن فلان
معي درر لن كان ودك بالدرر=معي قساوة عمر في ثوب الحنان
معي كنوز الفكر وأحمل ما ندر=من طيب الأشعار واحفظ للقران
معي سواليف وحكايات وعبر=طلق المحيا عذب منطوق اللسان
هذا أنا ياللي تدور للسير=باقي تقل لي سيرتك يا شمعدان
قال:أعتذر قلت:العفو مقبل عذر=عطني علومك كلها والليل زان
قال:الخبر لن كان ودك بالخبر=أنا خوي الدرب واللي كان كان
أنا رفيق الليل سموه البدر=أنا شموخ العز في سر وبيان
أنا الفجر وأنا المطر وأنا الزهر=أنا الحسن لن كان ودك بالحسان
أنا الهوى وأنا الدوا وأنا خطر=أنا من اللي طعنهم يرو السنان
هذا قصيدي فيه تفصيل العمر=معزوفة أيامي على عود وكمان
باقي حكاياتي على وجه الدهر=رسمتها لوحات من نحت ودهان
عند الفجر رديت مشعوف الفكر=على جواد الحلم وأرسنت الحصان

صحت الأبدان للجميع

تواجدكم أسرني وردودكم أسعدتني


لكم خالص تحيتي

صح بدنك ولا هنت


بارك الله فيك



لك خالص تحيتي