الوضع في غيبتك ماهو بعادي=كن الفسيحة بعد غيبتك ضاقت
أحس بين العوج مثل الوقادي=والنفس من صدمة رحيلك مافاقت
أون ون اللي طعنه المعادي=ويلومني بالود ناسٍ(ن)ماذاقت
ما ذاقوا اللوعات وقت البعادي=ما يعرفون أشواقنا لا تلاقت
لو ذاقوا اللي ذقت خافي وبادي=ما كان لاموني على روح تاقت
تاقت لشوفك ياضنين الفؤادي=من يوم غبت الروح ما يوم راقت
كني أسيرٍ(ن)موثق بالقيادي=أثقال قيده دون ممشاه عاقت
عفت الوناسة والسمر والرقادي=ما همي الا جروح للسد واقت
ترعى فؤادي مثل رعي الجرادي=لا حول بنبتٍ(ن)نواميه ساقت
ما كني اللي كان صعبٍ(ن)عنادي=حظي غدر بي والليالي مالاقت
اليوم أنا وإياك كلٍ(ن)بوادي=حلو الأماني واعدتنا وباقت
يالله يا معبود حقق مرادي=فرج هموم أرواحنا بعد ضاقت