آه من زفرة بالصدر مثل الجحيم=زفرة الشوق مدري زفرةٍ(ن)من قهر
بعد ما طرت بحلامي بجو النديم=وإمتزج فرحنا والشوق فيه إنصهر
طاح حظي وطحت بحضن حظي سقيم=لين قلبي أحسه يا غلاي إنفطر
ليتني ما صحيت وليت حلمي مديم=ليت لحظة هنانا عمرها من دهر
ما تمنيت غيرك في جديد وقديم=ولا تمنت عيوني غيركم للنظر
يا غناة الفؤاد أقسم بربٍ(ن)عظيم=الهنا ما نمله لو تمادى عمر
أجمل أيام عمري في رياض ونسيم=وأنت فيها حبيبي نبع ري وزهر
أنت نور الليالي وأنت جود الكريم=أنت بسمة غرامي وأنت نفحة عطر
أنت نبض المشاعر وأنت ملهم حليم=وأنت للروح غيث وللمشاعر مطر
الحسن فيك كله كل مابك وسيم=أعتقد بعض حسنك واهبه للقمر
مالكٍ(ن)للمحاسن بالخلق مستقيم=كل ما فيك نادر في جميع البشر
آه يا طول ليلي في غيابك بهيم=وآه من عيني اللي صادقت للسهر
كل ليلة وأنا والحظ خصم وخصيم=كني اللي يقلب فوق لاظي جمر
آه من زفرة بالصدر مثل الجحيم=زفرة الشوق مدري زفرةٍ(ن)من قهر