كل يعيد مع حبيبه ويرتاح=وانا حبيبي مقفيات ظعونه
راح الأمل والحلم من دنيتي راح=حال البخت والبعد والبين دونه
احس نبض القلب في داخلي ناح=الله يكون بعون قلبي وعونه
من ضيقته الدم في داخله فاح=وأرسله لطرافي وأحس بسخونه
أون من ممساي لا وقت الأصباح=وأكتم أنيني لا العرب يسمعونه
وياليت الك يا قلب ضبة ومفتاح=نقفله عن بعض العرب لا يجونه
نصك بابه لا تشالاه الارماح=ويا شين قلبٍ(ن)جايراتٍ طعونه
أقول طيب والبلا كلي جراح=والشاعر يبان الألم في لحونه
وأنا أشهد إن الود للرجل ذباح=ينزله لو كان بأعلى حصونه
وليا تقافن الظعاين كالأشباح=تخر دمعات الحزن من عيونه
أراقب البراق مقفي ليا لاح=الريح تدفع مقفياتٍ(ت)مزونه
مالي رفيق الا قوافي ومسباح=اللي أحسه من وجع يشعرونه
تعرف بسر القلب قدام الإفصاح=ومن لا يخون لعشرتي ما تخونه
لا عدت يا حظٍ بعد قومته طاح=ما جبت من مغزاي غير المهونه
كل يعيد مع حبيبه ويرتاح=وانا حبيبي مقفيات ظعونه