العام كنت ليا طلبتك تردين=واليوم صار الوضع ماهو كما العام
اليا طلبتك يقعد الرد شهرين=مدري وش اللي غيرك عذب الأنسام
مدري حداك عن المواصل قريبين=والا حداك الوقت وظروف الأيام
والا تغير ودك اللي تقولين=وتبدلت أحلام ماضيك بأحلام
والا سمعتي هرج ناسٍ عذولين=اللي يبونا مثلهم نصبح أخصام
والا قسي قلبك لمنهو تحبين=وحل التناسي فيه وأصبح له الهام
والمشكة لن كان مأنتي بدرين=إن الصدود يعد لشعورنا سام
يذبح مشاعرنا كما ذبح سكين=وأقسى حكم معروف بالكون الإعدام
وإن طاوعك قلبك على الهجر تقوين=أنا ورب البيت ماني بظلام
بواصلك من حين لا حين لا حين=كلي وفا والطيب راعيه ما يلام
وإن كان ما تدرين تدرين بعدين=إن الوفا سجية شيوخ وكرام
مهما يبعد بيننا نازح البين=تبقين وسط القلب من دونك لحام
عوج الضلوع وتحرسك نظرة العين=والصبر طيب والوعد معك قدام
اليا طلبتك ثم عدتي تردين=وعادت ليالنا مثل فعلك العام