تعبت واتعبت المشاعر والأحلام=وأتعبت من مابي طروق القوافي
جففت من بوحي جديدات الأقلام=بعد الطراوة صابهن جفافي
أعاتب الأيام وأبكي على أعوام=كانت أمامي ثم صارت خلافي
أخذت كثيرٍ(ن)من مسرات وألام=واللي بقا عن نظرة العين خافي
ماني بداري وش يجيبن الأيام=تصفي لي الأيام والا تعافي
وأنا أشهد إن الوقت للحيل هدام=ياما طوى في دورته من سنافي
وياما كسر لشموخ فارس وحكام=وياما تعكر ماه في جم صافي
وياما صفا وأروى معاطين وحيام=صارت مزاين عقب كانت عجافي
ياما رفع لأقوام وأذل لأقوام=نظام ماشي ما يعرف إنحرافي
تدبير خلاق المخاليق علام=يعلم بشيءِ(ن)للبشر مايشافي