لا تعتذر العذر ماهو بكافي=جرحك بقلبي ما تداويه الأعذار
ما كل عذرٍ(ن)للطواعين شافي=ولا كل جرح يبان لحداد الأنظار
ينزف لو إنه بالنظر ما يشافي=الدم يغلي غلي زيتِ(ن)على نار
أوجاع قلبي ساترتها النحافي=بين الضلوع بقلب كاتم للأسرار
وأقول أنا طيب ولا من خلافي=صابر وربي عون مع كل صبار
من شأن لا يفرح بحالي ضعافي=ناسٍ(ن)تدور للشماته بالأحرار
من حبةٍ(ن)يبنون قبه يا كافي=ومن ماش سووا صار لو كان ما صار
ما يفرحون إلا بطيحة سنافي=يلقا بها ما يبتغي كل ثرثار
يمدح بوجهي والهتايل خلافي=مثل: ليا غاب القطو يلعب الفأر
وإن عودت لمواجهٍ(ن)بالرهافي=ما ينلقي ويروغ روغات مكار
حتى لو إنه بالسوالف خرافي=لكن بوقت الجد من ماقفه غار
مثل الخروف ليا إنعزل عن خرافي=إن كان ما تربطه لو تطلقه نار*
يا مدور الأوجاع دور عوافي=لا تتبع الأنذال دور للأخيار
دور على قدك حمولٍ(ن)خفافي=خل الكبار يشيلها غيرك كبار
لا تعتذر العذر ماهو بكافي=جرحك بقلبي ما تداويه الأعذار

المشاركة الأصلية كتبت بواسطة طارق العبيدي (المشاركة 143321) صح لسانك اكثر من رائع والله استمتعت بها ايما استمتاع دمت ودام عطاؤك

صح بدنك ولا هنت


حياك الله سعدت بحضورك وردك الطيب